Is-Sezzjoni Żgħażagħ Lijani bdiet fl-2023 b’għan sempliċi iżda qawwi: noħolqu spazju fejn iż-żgħażagħ ta’ Ħal Lija jistgħu jingħaqdu, jagħmlu differenza u jiċċelebraw il-komunità tagħhom. Minn dakinhar ’il quddiem, bdejna nibnu storja mimlija attivitajiet, ħbiberiji u inizjattivi li jġibu lin-nies flimkien.

Matul is-snin organizzajna attivitajiet għaż-żgħażagħ u għall-familji kollha – fosthom parties tal-Karnival u tal-Milied, bħala opportunità biex inwasslu ferħ, kreattività u spirtu ta’ festa fil-qalba ta’ Lija. Kull sena niġbru ikel f'Jum il-qaddissin, biex ngħinu lil min għandu bżonn, għax nemmnu li l-komunità tikber meta nħarsu lejn xulxin.

Illum, bħala grupp ta’ 10 żgħażagħ bejn il-15 u l-25 sena, nibqgħu nimxu ’l quddiem b’passjoni u b’impenn lejn ir-raħal tagħna — nibnu fuq dak li għamilna u niftħu bibien għal aktar proġetti, aktar ideat u aktar ġid għall-lokalità tagħna.